ગઝલ: કાળને હાંક મારો—શયદા

કાળને હાંક મારો—શયદા

જુઓ! કાળ મારો ભમે છે બિચારો,

હું  અહીંયા છું એને જરા હાંક મારો.

 

સુકોમળ કળીના કળું છું વિચારો,

તૂફાની પવનના સહેજે પ્રહારો.

 

વિસામો નથી કે નથી કો ઉતારો,

જગતમાં કરું છું જ્યાં ત્યાં પુકારો.

 

નિયંતા! કરું છું અરજ: આ જગતના-

બધાં પાપ મારે જ ખાતે ઉધારો.

 

નહીં થાય દર્શન કદી દિલરૂબાના,

નજરમાં ભરેલા હશે જો વિકારો.

 

કદી ધર્મમાં પાપ જોયા કરું છું,

કદી પાપમાં ધર્મનો છે વધારો.

 

અજાણ્યા થઈ પ્રશ્નકોને કરો છો?

નથી જાણતા હું છું શયદા તમારો.

 

( સૌજન્ય:શયદાનો ગઝલ ગુલઝાર  પ્ર.91)