Posted by: bazmewafa | 02/06/2014
ગઝલ:પથ્થરને ખાઈ ગઈ……શોભિત દેસાઈ
પથ્થરને ખાઈ ગઈ……શોભિત દેસાઈ
વીજળી પડી તો પાયાના પથ્થરને ખાઈ ગઈ,
શરૂઆતમાં એ કક્કાના અક્ષરને ખાઈ ગઈ.
વધતો કિનારો જોયા કરેછે વકાસી મ્હોં,
નાદાન માછલીઓ સમંદરને ખાઈ ગઈ.
સંદેશો જાણી જોઈને સમજ્યું નહીં કોઈ,
ઝેરી પ્રજાઓ પાક પયમ્બરને ખાઈ ગઈ.
ઉપયોગમાં ન લેવાય જો લાંબા કાળથી,
ઝીણી જીવાત આખાય બખ્તરને ખાઈ ગઈ.
ઐયાશી ગુપ્તવેશે પ્રવેશી અને પછી,
આળસ ભરાય એવી કે લશ્કરને ખાઈ ગઈ.
ઉત્તમ લખે છે પોતે-ના ભ્રમમાંજ એ મર્યો,
જુઠ્ઠી પ્રશસ્તી છેવટે શાયરને ખાઈ ગઈ.
(સૌજન્ય:શબ્દસૃષ્ટિ-જાન્યુઆરી:2014*8)
Leave a comment