એકના બે થાયના—શયદા
વાત આ કહેવાયના સહેવાય ના,
એ જુઓને એકના બે થાય ના.
જાન મારી જાય અથવા જાય ના,
એટલું ઈચ્છું કે તું ભૂલાય ના.
એમને રસ્તો કદી મળતો નથી,
ઠોકરો જે આ જગતમાં ખાય ના.
કાળની દાંડી નગારા પર પડી,
રાત મારાથી હવે રહેવાય ના.
બે હશે તે બેના બે રે’શે સદા,
એક છે તો એકના બે થાય ના.
આંખ એ નાસૂર છે ચહેરા ઉપર,
શર્મથી એ લેશ પણ શરમાય ના.
ઝંખના એની મઝા એમાંજ છે,
ચાહું છું મેળાપ એનો થાય ના.
આપનું જોબન જુઓ ઝોલે ચડ્યું,
જીવ મારો કેમ ઝોલા ખાય ના.
યાદ આવ્યા કામ ‘શયદા’ કાલના,
આજ પાણી આંખડીમાં માયના.
(સૌ. ગઝલ સમ્રાટ શયદાનો ગઝલ ગુલઝાર પૃ-142)
muje yah gazal padh ke bahut accha laga, or aage bhi aap isehi gazal likho yahi prabhu se prathana
By: Bhavna Dave on 07/30/2011
at 6:28 AM