Share this:

પાછા વળે કયાંથી?—પ્રફુલ્લ વોરા

 

નહીંતો આમ દ્રશ્યો આંખથી પાછા વળે કયાંથી?

ધરેલા હોઠ પ્યાસા જામથી પાછા વળે કયાંથી?

 

હથેળી નામના આ રણ ઉપત કિસ્મત લખાવીને,

છળી ઊઠેલ હરણાં હાંફથી પાછા વળે કયાંથી?

 

નદીની જેમ નાજુક લાગણી દરિયો બની બેઠી,

પછી તો ફીણ- મોજાં નાવથી પાછા વળે કયાંથી?

 

નથી વિશ્વાસ પડતો કાગડાના બોલ પર,દોસ્તો,

ટકોરા આમ અમથા દ્વારથી પાછા વળે કયાંથી?

 

હશે આ ઝાડને પીળાશનો લૂણો ગયો લાગી,

લીલા ઘેઘૂર ટહુકા ડાળથી પાછા વળે કયાંથી?