રાત જીવ્યા તો સહર જોઈશું,

લોહી ભીનું આ નગર જોઈશું.

       –દીપક બારડોલીકર

  

તને યાદ તો હશે—કિસન સોસા

 

એ લાગણીનું ગામ તને યાદ તો હશે,

તારો જૂનો મુકામ તને યાદ તો હશે.

 

મેડીએ તું હતી અને દીપ ધૂંધળો,

કસબો એ સૂમસામ તને યાદ તો હશે.

 

તારી પલકની છત તળેથી આવતો જતો,

એ છોકરો અનામ તને યાદ તો હશે.

 

ચહેરો કદાચ આજ તને યાદ હો ન હો,

આંખોની એ સલામ તને યાદ તો હશે.

 

મુજ આહટે એ આવવું દીવાને ખાસથી,

તારું દીવાને આમ, તને યાદ તો હશે.

 

જે તિશનગીમાં જાગતું’તું આગિયા સમું,

ખોવાયેલું એ નામ તને યાદ તો હશે.