Share this:

અંચઈ નહિ કરવાની — કીર્તિકાન્ત પુરોહિત

 

દાવ જે પટમાં મળે રમવાનું, અંચઈ નહિ કરવાની

દાવ દેતા જઈ હુંતુંતું કરવાનું, અંચઈ નહિ કરવાની

 

લોહીમાં ચરબીના કણ બનતા રહે, વધતા યે રહે

જોર ખુદનું જોઈ ઉછળવાનું, અંચઈ નહિ કરવાની

 

લ્યો લખાવું બાળપણનું એક લીટીમાં ઉપનિષદ

ખડખડાટે  નાભિથી હસવાનું, અંચઈ નહિ કરવાની

 

રેત-શીશી જિંદગીની મધ્યમાં મળશે સાંકડી

સહેજ સંકોડાઈને સરવાનું, અંચઈ નહિ કરવાની

 

એમ આઉટ પણ થવાનું નહિ રમતમાં જોડાઈને

છેક અંતિમ શ્વાસ લગ લડવાનું, અંચઈ નહિ કરવાની

 

તાજ ઇસુનો કાંટાળો કે ‘કીર્તિ’નો   ગજરાળો મળે 

આપણે તો માથું બસ ધરવાનું, અંચઈ નહિ કરવાની