કફનની છેડછાડ–વલી લખાણી
એ શમાં, ના કર પતંગાના જીવનની છેડછાડ,
આગ કંઈ કરતી નથી કો’ દી પવનની છેડછાડ.
પુષ્પને ઓ ચૂંટનારા, કંટકોનો ખ્યાલ કર,
કંઈક જખ્મી થઈ ગયા કરતાં સુમનની છેડછાડ.
ક્યાંક કહી દેશે થઈ વાચાળ મારી ઉર્-કથા,
ઓ હૃદય ,રે’વાજ દેજે તું નયનની છેડછાડ.
બહારમાં મળવાનું દીધું’તું મને એણે વચન,
ઓ ખિંજા કરજે નહીં આજે ચમનની છેડછાડ.
પ્રજળી ઊઠશે દિલનો અગ્નિ, અશ્રુઓ ઊભરી જશે,
તું નયનથી કર નહીં મારાં નયનની છેડછાડ.
આવતાં તેઓ હશે મળવા મને અબ ઘડી,
મોત ! બે પળ ધૈર્ય કર,ના કર જીવનની છેડછાડ.
જિંદગી આખી રગદોળાય ચાલી ધૂળમાં,
કબ્રની માટીએ ! હવે ના કર કફનની છેડછાડ.
કંઈક તાજા થશે જ્ખ્મો ફરી આજે ‘વલી’,
તું કરે કાં વેદના-ભરપૂર કવનની છેડછાડ.
આપના પ્રતિભાવ