હુકમનું પાનું છે —અમૃત ઘાયલ

 

આપણું તો ફકત બહાનું છે,

રાજ કરપીણ્ કાયદાનું છે.

 

કોઈ તત્પર નથી અમલ તજવા,

તંત્ર આખું અમલ દીવાનું છે.

 

કૈં નૂર નથી *બાહયાનું અહીં,

મૂલ્ય અહીં માત્ર *બે હયાનું છે.

 

એમના આગમનનું શું કહેવું,

એમનું આગમન બલાનું છે.

 

આ7ખ છે કિંતુ સાવ છે કોરી,

દિલ છે કિંતુ દરદ વિનાનું છે.

 

કમ નથી એમનું સહિષ્ણું પણું,

એય ષડયંત્ર એક છાનું છે.

 

બક્ષો કાનુનને વધુ વિસ્તાર,

ત્રાસ માટે એ ક્ષેત્ર નાનું છે.

 

શ્વાસ અહીંના છે લોહની જંઝીર,

આયખું ઘોર કેદખાનું છે.

 

છે અશન પણ હવા નિવાસ હવા,

અંગ પર શસ્ત્ર પણ હવાનું છે.

 

તેજ હરગિજ હરામનું ન ખપે,

આપણે તો આ તિમિર મજાનું છે.

 

એની પાસે છે ,’એકો’ તો ‘ઘાયલ’

મારી પાંસે હુકમનું પાનું છે.

  

બા હયા=:લજાશીલ

બે હયા=:લજ્જા શૂન્ય