અલ્લાહના દરબારમાં—‘સિરાજ’ પટેલ,પગુથનવી

 

જિંદગી આ કેદ છે દુનિયાના કારાગારમાં, 

માનવી રહેંસાઈ ર્હ્યો છે દુ:ખી સંસારમાં.

 

લાલસા લાલચ ને માયા કામ કંઈ ના આવશે, 

નફસ પર કાબુ કરીલે તુ આ નર્કાગારમાં.

 

તું એ જાણે છે કે દુનિયા એક ફાની ધામ છે, 

તો પછી અટવાય શાને  નર્યા પાપાગારમાં.

 

છે જવાનું આખરે બે ગજ કફનની આડમાં, 

તો પછી લાલચ કરેછે શીદને આ સંસારમાં.

 

તુ હૃદય પાવન કરીલે ને ખુદાને યાદ કર, 

દર ન રહેશે લેશ પણ તુફાન ને મઝધરમાં. 

 

તું સિરાતે મુસ્તકીમને દિલથી અપનાવશે, 

મગફેરત તારી થશે અલ્લાહના દરબારમાં.

 

ઈશ ની માફી મળે છે ફકત પશ્ચાતાપથી, 

’સિરાજ’ તુ ડુબકી લગાવી દે આ સ્નાનાગારમાં.