Share this:

એક બાર ગર્લ- જય ગજજર, C.M.,M.A

 

“એક બીઅર” ન્યુ યોર્કના એ બારમાં કાઉન્ટર સામેના સ્ટુલ પર બેસી પીટરે ઓર્ડર આપ્યો.

બાર ગર્લ હેલન ઘડીભર તો એની સામે જોઈ રહી. બે વર્ષથી રોજ સાંજે નવ વાગે એ બારમાં આવતો. સાત અઠ બીઅર ઢીંચી બાર વાગે એ બારમાંથી વિદાય લેતો. એક સોહામણો યુવાન જિંદગી ખોટી લતમાં વેડફી રહ્યો હતો એનું એને દુઃખ હતું.

એના પ્રત્યે પ્રેમ અને સદભાવ જાગ્યાં હતાં. એણે કાઉન્ટર નીચેથી એક ગુલાબ કાઢી એને આપ્યું.

પીટર ઉશ્કેરાયો, “મેં બીઅર માગ્યો, ગુલાબ નહિ.”

“મને ખબર છે. શા માટે યુવાની વેડફી રહ્યા છો?”

“નન ઓફ યોર બિઝનેસ! તું ગુલાબ આપી તારી જાળમાં મને ફસાવા માગે છે? સુઝને આમ જ ગુલાબ આપી મારું મન હરી લીધું હતું. હું એને બહુ પ્રેમ કરતો હતો. પણ એ મને છોડીને બીજાને પરણી ગઈ. એને ભૂલવા, મનને બીજી દિશામાં વાળવા બીઅર એજ મારો આશરો છે. ‘વુમન અને વાઈને’ મારી જિંદગી રોળી નાખી. સ્ત્રી જાતને ધિકકારું છું. એને માટે નફરત સિવાય મારી પાસે કંઈ જ નથી એટલે બીઅરનો આશરો લીધો. તું મને પ્રેમ આપી શકીશ? કે ભ્રમજાળ ઊભી કરી મારી જિંદગી બરબાદ કરી નાખીશ!”

“તમે કદી દારૂ ન પીવાની પ્રતિજ્ઞા લો તો હું તમને માત્ર પ્રેમ જ નહિ મારૂં સર્વસ્વ સમર્પી તમારી વફાદાર અર્ધાંગના જીવનભર બની રહીશ. તમે મને ગમવા લાગ્યા છો. તમે દેખાવડા, પ્રતિભાશાળી, હસમુખા નવજુવાન છો. તમારું યૌવન ખોટા માર્ગે વેડફાઈ જાય એ મારાથી જોયું નથી જવાતું. રાત્રે બાર વાગે ઘેર જાઉં, પથારીમાં આડી પડું પણ કલાકો સુધી તમારા વિચારોમાં ઊંઘી શકતી નથી એટલે આજ તમારી સમક્ષ હૈયું ખોલવાની હિંમત કરી. મારા પર વિશ્વાસ રાખો. હું તમને દગો નહિ દઉં. મને કહો, હું તમને ગમું છું?”

“તમે યુવાન છો, રૂપાળાં છો, હસમુખાં છો, કોઈનું હૈયું હરી લો એવાં છો પછી કેમ ન ગમો? પણ સ્ત્રી જાત પર મને જરા કે વિશ્વાસ નથી. સ્ત્રી જાત પ્રત્યે નફરત સિવાય મારી પાસે કંઈ જ નથી. તમે પસ્તાશો. શા માટે જીવનથી હારી બેઠેલા સમક્ષ તમારું પ્રેમાળ જીવન હોડમાં મૂકવા તૈયાર થાઓ છો?”

“બધી જ સ્ત્રીઓ એક સરખી નથી હોતી. સ્ત્રી એટલે પ્રેમનો ધોધ. પતિને સન્માર્ગે દોરનાર એક દેવી. મેં બારમાં આવતા ઘણા પુરૂષોને જોયા છે. મારી પાસે મારા દેહની માગણી કરી છે. મારી પાછળ પૈસાની છોળો ઉડાડવાનાં પ્રલોભનો ઊભાં કર્યાં છે પણ તમારા જેવા સજજન કોઈ જોયા નથી એટલે જ તમારામાં મન મોહી પડયું છે. મારે આ નરકવાડામાંથી છૂટવું છે. એક સારો પતિ મેળવી સરો સંસાર માંડવો છે. દામ્પત્યસુખ માણવું છે. બેચાર બાળકો સાથે કુટુંબનો લહાવો માણવો છે. બોલો, આ લત છોડી હતાશાની જિંદગીમાંથી છૂટકારો મેળવી સુખી, આનંદી, પ્રેમાળ અને આદર્શ જીવન જીવવું છે?”

“સાચું કહું તો પહેલે દિવસે આ કલબમાં આવ્યો ત્યારે તમારાથી આકર્ષાયો હતો, તમને જીવનસાથી બનાવવાનાં સપનાં સેવ્યાં હતાં એટલે જ રોજ આ કલબમાં આવવા લાગ્યો. તમારો સાથ અને તમારો પ્રેમ જ મને અહીં ખેંચી લાવતો. પણ સ્ત્રી જાત પ્રત્યેની નફરત મને તમારા પ્રત્યે પ્રેમ ન જગવતો. આજ તમે હૈયું ખોલ્યું છે ત્યારે બાર વાગે સાથે જ જઈશું. આજથી જ બીઅરનો ત્યાગ અને આ કલબના દરવાજાને તિલાંજલી.”

“બાર વાગ્યા સુધી રાહ જોવાની શી જરૂર છે? મને તમારામાં શ્રધ્ધા જાગી હતી અને આજ પરોઢના સપનામાં તમે મને સ્વીકારી લીધી હતી એટલે મારું સપનું સાકાર કરવા હું રાજીનામું લખીને જ આવી છું.ચાલો, બોસને રાજીનામુ આપી તમારી સાથે જ ચાલી નિકળું છું.” કહી એ સ્મિત સહ બોસની કેબિનમાં દોડી ગઈ. પાંચ જ મિનિટમાં બહાર આવી પીટરનો હાથ પકડી બંને કલબની બહાર નિકળી ગયાં.

સામે સોળે કળાએ ખીલેલ પૂનમનો ચાંદ બંનેના જીવનમાં આનંદોર્મિની ભરતી લાવી રહ્યો.

                                              ***

 

41 Palomino Drive, Mississuga,Ontario, Canada L4Z 3H6 Tel905-568-8025 Rmail: gajjar@gmail.com “Neil”,Plot#207, sector 29.Gandhinagar,382 029 Tel 23234273