કેટલા વર્ષો પછી તું માવઠા જેવું હસી એમ લાગ્યું કે નદી પાછી પહાડોમાં ધસી

ગઝલ

માવઠા જેવું હસી-અશોકપુરી ગોસ્વામી

સૂર, શબ્દો ,અર્થ ,પડઘા આખરે નિષ્ફળ ગયા
આર્દ્ર્તા મારી હવે જો મૌનની અંદર વસી

હે નિકટતમ સત્ય સમજાવું તને બોલ્યા વગર
કૈં કહી શકતો નથી જેથી ધરી જો આરસી

હું સમજના સૂર્યમાંથી ઉદભવેલું તેજ છું
આ દિશાઓ ને ક્ષિતિજો એક ઈશારે ખસી

મંત્ર માફક લ્યો ,ગઝલ જન્મી અલૌકિક એ રીતે
શબ્દની દિવાસળી જયાં લાગણી સાથે ઘસી.