ગઝલ:મને એ ખબર નથી—અમૃત ઘાયલ

ગઝલ

 

 મને એ ખબર નથી—અમૃત ઘાયલ

 

એ રેણ છે કે સંઘ મને એ ખબર નથી

શું ચીજ છે સબંધ મને એ ખબર નથી

 

 

સંવેદનાનું મુકત ભ્રમણ એટલે સુગંધ

બાકી શું છે સુગંધ  મને એ ખબર નથી

 

 

બસ આમ ઊડ ઝૂડ ખર્યે જાઉં છું સતત

હું ખુલ્લો છું કે બંધ મને એ ખબર નથી

 

 

દોરું છું કદી અન્યને કદી દોરાઉં છું સ્વયંય

છું દેખતો કે અંધ મને એ ખબર નથી

 

 

આ જેના જોરે જાઉં છું હડસેલતો મને

એ હાથ છે કે સ્કંધ મને એ ખબર નથી

 

 

મિત્રો ગઝલ ગઝલ છે ગઝલ એટલે ગઝલ

એ રંગ છે કે ગંધ મને એ ખબર નથી

 

 

‘ઘાયલ’હું એને ચાહું છું સંપૂર્ણ ચાહું છું

છે કિંતુ શો સબંધ મને એ ખબર નથી

(ઝાંય)