માં યાદ છે મને__બાબુ પટેલ

સળગતા સૂરજનાં ઊના ઊના વાયરા

ને વરસતા વ્યોમના ઘોર અંધકારમાં

કાદવની કેડીયે હાથ ઝાલી ચાલતાં

એ ખેતરનાં શેરઢા યાદ છે મને

માં યાદ છે મને

 

તમે ખોદીને વાવતા જુવાર કપાસિયા

ને ચાસને ખોતરતા હાથના પપીલા તારા

યાદ છે મને

 

અને યાદછે મને

અંકુર ઉગમતા એ ઉછળતા છોડવા

ને અંબર ને આંબવા મોટા થતા

પેલા પાકેલા પાકનં કૂણા કણસલા

ને પોંક ખવડાવતા એ ખરબચડા હાથ

એના સ્પર્શનાં ફૂવારા યાદ છે મને

  

અને યાદછે મને

એ અંધારી રાતના ઉના ઉના રોટલા

ને છલકાતી છાસની ખાટી મીઠાશ

અને નેહથી વરસતા એ મેઘની ભીનાશ

અને ઝળહળતી દીવીનો દિવ્ય પ્રકાશ

હજી યાદ છે મને

માં યાદ છે મને