ઓ ખુદા_ દીપક બારડોલીકર

 

 

નઝમ(હમ્દ_સ્તુતિ સ્વરૂપે)

 

ઓ ખુદા,મારા ખુદા !

પૂર્વને પશ્ચિમનો માલિક તું જ છે

સર્વ સૃષ્ટિઓનો ખાલિક તું જ છે

સર્વ મોટાઇનો ધારક   તું જ છે

બંદગીને એક લાયક  તું જ છે

          ઓ ખુદા,મારા ખુદા !

 

તારી મરજીથી બધી રોનક, રતાશ

તું જ બેશક છે ઉજાશોનો   ઉજાશ

તું જ સાચો શ્રેષ્ઠ પાલનહાર  છે

જીવ ને નિર્જિવનો આધાર છે

             ઓ ખુદા,મારા ખુદા !

 

સ્પર્શ તારો પૂણ્ય ભરચક જામમાં

સ્મિત તારૂં સર્વ શુભ અંજામમાં

ઇષ્ટ તારો રંગ  સર્વે   રંગથી

શ્રેષ્ઠ તુજ સબંધ સૌ સબંધથી

         ઓ ખુદા,મારા ખુદા !

 

સૃષ્ટિઓની ચાવી તારા હાથમાં

શ્રેષ્ઠમ છે શાહી તારા હાથમાં

ઇલ્મનો ગરવો ધણી બસ તું જ છે

માર્ગ દર્શક રોશની બસ તું જ છે

          ઓ ખુદા,મારા ખુદા !

 

ન્યાયનાં દિવસતો તું એકજ ધણી

તારી સત્તાઓ સતત સર્વો પરી

બદલો દેશે તું રજે રજનો જરૂર

જાલિમોતો ખાખમાં ભળશે જરૂર

             ઓ ખુદા,મારા ખુદા !

 

તુંજછે બસ તુંજ ખ્વાબો ખ્યાલમાં

મે’ક ભીના મારા અંતર બાગમાં

શ્વાસે શ્વાસે તુજને મળવાની તડપ

તુજ અનુપ ઓજસમાં ભળવાની તડપ

                 ઓ ખુદા,મારા ખુદા !

 

માન્ચેસ્ટર રોયલ ઇંફરમરી

ઑગાષ્ટ ‘94

(‘સિરાતે હરમ’_16 ના સૌજન્યથી)