સનસનાટી
મુકતક
સનસનાટીની આંગળી પકડીને ધમરોળે મને.
ટેરવાં નખ,સ્પર્શ મારાં થઇ તરછોડે મને.
આંગળી આ ધ્રૂજારી વારસાગત શ્રાપ છે,
આ ધ્રૂજારી આવતે જન્મેય નહીં છોડે મને.
ગાલ ઉપર ખંજનો
ગઝલ
પ્રેમ આખે જિંદગીનો મર્મ છે.
એ વિનાની સર્વ વાતો તર્ક છે.
ગાલ ઉપર ખંજનો હોતાં હશે?
એ તમારાં ટેરવાંનો સ્પર્શ છે.
શોર પર વાહ જો એની મળે,
એ જ ક્ષણ મારાં જીવનમાં પર્વ છે.
હોઠ તારા એજ છે પણ તે છતાં,
નામ ત્યાં મારું નથી_નો ફર્ક છે.
હું તને વાંચું નહીં તો શું કરું?
તું બધી યે વાતનો સંદર્ભ છે.
હું કરચલાથી સદા ડરતો રહ્યો,
આમ જોકે મારી રાશિ કર્ક છે.
_ હિતેન આનંદપરા
